السلام عليكم ورحمة الله وبركاته
.. مسآكم الله بالخير .. في البداية احب اعرفكمـ بنفسي اخوكم ابو عبدالله … و بما اني ما عندي ذيك الخبرهـ في اللغة العربية الفصحى ابكتب لكم بالعامـي عشآن اكون اقرب للفهم .
اليوم جايب لكم تجربتي في شرآء برنامج كونكتفآي مي .. البرنامج هذا يحتاجه طلاب الجامعات اللي ساكنين في السكن الجامعي … أو الاشخاص اللي ساكنين في عمارة والواي فاي عنده ضعيف لكن يقدر يتصل بالإيثرنت ,,
بصراحة انا احتاج البرنامج هذا بشكل اساسي عندي بالشقة .. السبب طآل عمركمـ ان النت في العمارة اللي انا فيها ألياف ضوئية من موبايلي .. و الواي فاي ما يوصل لـ شقتي ابد .. او يوصل برج واحد ويروح .. وخبركم الجوال لازم يكون فيه نت .. وأنا ما عندي إلا أني النت على اللابتوب بـ السلك Ethernet فـ قمت وحملت هالبرنامج من النت (يعطونك فترة تجريبية لمدة يومين ) عشان اخلي اللابتوب يصير زي الراوتر ويوزع لي نت من النت اللي واصل للابتوب عن طريق السلك واقدر اشبك النت على الجوال على الواي فاي ,
ما ودي اطول في شرح البرنامج . اللي عندهـ اي استفسآر يبشر وانا حاضر وتحت امرهـ
لما حملت النسخة التجريبية .. فتحت على موقعهم ابشوف كم سعر النسخة الكاملة
هذا موقع البرنامج الررسمي http://www.connectify.me
حصلت سعر البرنامج عليه تخفيض 70% .. وهذي صورة توضح الاسعار بعد التخفيض
الأول بالصورة يعني / تحصل على ثلاث نسخ مدى الحياة لـ برنامج connectify me Hotspot PRO + connectify me dispatch بـ 19.5 دولار
(ابشررح لكم وش هالبرنامجين تحت )
الثاني بالصورة يعني / تحصل على نسخة واحدة مدى الحياة للبرنامجين اللي فوق
الثالث بالصورة يعني / تحصل على نسخة واحدة مدى الحياة لبرنامج connectify me Hotspot PRO
برنامج هوت سبوت هو البرنامج اللي شرحت لكم فوق اللي يوزع نت من اللابتوب
أما برنامج الديسباتش هذا تقدر تستخدمة لتجمع اتصالين نت ويعطيك سرعتهم مع بعض .. يعني نفس الميزة اللي في الجالكسي اس فايف اللي تجمع لك النت حق شبكة الجوال مع النت حق شبكة الواي فاي عشان يعطيك اقصى سرعة ممكنه من النت
انا قلت دام الفرق بسيط .. ابشتري الخيار الأول ابو ثلاث نسخ .. لآني اعرف واحد من اخوياي محتاج نفس البرنامج يعني راح استفيد من نسختين .
ههههههههه طبعاً طريقة الشراء سهله جداً ..مجرد تعبي بياناتك وخلاص يرسلون لك الاكسس على ايميلك ,
هذا موقع الشركة الرسمي
بعد ما ندخل نضغط على كلمة See Pricing بالاخضر ,,
وبتطلع لنا الصفحة هذي ,, ( هذا عرض مؤقت حق الخصم يعني اللي بيشوف الموضوع بعد شهور يمكن ما يطلع له نفس العرض )
نضغط على click here اللي بالاخضر عشان نستخدم الخصم .. وبتفتح لك الصفحة ذي .. وموجود فيها الاسعار .. اختر الشيء اللي يناسب معك ,
بعد ما تختار الباقة .. بيطلع لك الشيء ذا وفيه المبلغ اللي بتدفعه ( الفاتورة )
طبعاً هو طلعها لي بالريال السعودي .. ولكن الافضل انك تحطها بالدولار (لآن سعر الصرف عندهم يعتبر اغلى من سعر الصرف بالفيزا ) وعشان تغير العملة .. اضغط على Saudi arabia و اختر مكانها United State
اللي ما طلعت له صفحة العرض ., يقدر يستخدم الكوبون هنا ويحصل على الخصم لو كان موجود .. أدخل : DEAL70 وبعدين اضغط ابديت كوبون .
ننزل شوي ونجي لتعبئة البيانات ..
1- اسمك الكامل
2- اذا كنت شركة اكتب اسمم الشركة واما لو كنت مستخدم عادي خله فـاضي
3- إيميلك (وترا بيكون هذا هو اليوزر نيم حقك)
4- إعادة كتابة الإيميل
5- طريقة الدفع .. باي بال وإلا بالكريدت على طول ,.. أنا افضل الباي بال .. لكن المشكلة انه ما قبل معي بالباي بال .. واستخدمت الفيزا دايركت
6- رقم الفيزا
7- تاريخ انتهاء الفيزا وتحصله موجود على الفيزا
8- الكود اللي يجي خلف البطاقة ويتكون غالباً من ثلاث ارقام
9- الرمز البريدي اللي مسجل في الفيزا حقتك
وبعدها حط كومبليت اوردر اللي بالاخضر تحت ..
وبتطلع لك هالصفحة تفيد بـ إتمام عملية الشراء بنجاح .. و بيرسلون لك الفاتورة وبيانات حسابك و الرخصة على حسابك عشان تستخدم البرنامج بشكل كامل
في الختام .. اتمنى يكون الشرح واضح سواءاً بالتعريف بالبرنامج أو حتى الدفع (طريقة الدفع تعمدت تبسيطها إلى ابعد حد عشان اللي توهـ مبدئ يمشي مع الشرح تمام .. واما اللي يعرف يشتري من النت ما اظن يحتاج الشرح ههههههههههه )
وأعتذر لكم على الإطالة 😛
احب اشكر اخوي @arabshop على اتاحة هالفرصة لكـي افيد و استفيد و إلاقيكم إن شآء الله في مواضيع وتجارب اخرى ,,,
انتظروا قريباً تجربتي و طريقة شراء جوال onePlus One من موقع الشركة الرسمي بعد الحصول على دعوة لشراء الجوال .. بس هاليومين صراحة مشغول شوي اذا فضيت ضبطت الموضوع و نزلته بالمدونة لكي يستفيد الجميع ,,
والشرح خاص وحصري لموقع www.3souq.com
الله يعطيك العافيه
موضوع مفيد جدا لمن بعانون من مشكلة النت الضعيف
بانتظار مواضيعك القادمة …